Қазақстандағы діни төзімділіктің ерекшелігі

Аңдатпа

Қазіргі әлемде ұлтаралық, дінаралық қайшылықтар мен халықаралық және аймақтық деңгейдегі мәселелер одан сайын шиеленісіп барады. Батыс саясаткерлері мен қоғам қайраткерлері мультикультурализмнің күйреуі туралы сөз етуде, ал батыс қоғамында күшті миграциялық қысым мен терроризм көріністерінен туындаған Еуропадағы иммигранттарға қарсылық білдіру жағдайлары әлемде толеранттылық дағдарысы туралы мәселе көтеріп отыр. Тіпті дамыған демократиялық елдердің өзінде ұлтаралық, нәсіларалық, конфессияаралық және басқа да қатынастардағы агрессия, шовинизм, ұлтшылдық көріністері белең алуда. Тәуелсіздік алғаннан кейін Қазақстан Республикасы кеңестік кезеңде қалыптасқан қоғамның көпұлттылық жағдайында ұлттық және діни тұрғыдан өзіндік сананы жоғарылату аясында және демократиялық қайта құрулар кезінде пайда болған көпконфессионалдылық жағдайындағы терең саяси өзгерістермен сипатталатын дамудың жаңа тарихи кезеңіне аяқ басты. Қазақстанның экономикалық және саяси жүйесін трансформациялау кезеңінде белгілі бір жағдайларда жүзеге асырылуы мүмкін және қоғамның тұрақтылығына барынша теріс әсер ететін көптеген ықтимал тәуекелдер кездеседі. Қазіргі жаһандану әлемінде толеранттылық принципі ұлтаралық келісімнің ең маңызды қағидасы болып табылады және іргелі тұлғааралық этика элементтерінің бірі болып есептеледі, мұнда  барлық адам ең жоғары әлеуметтік тіршілік иесі ретінде қарастырылады және егер оның мәдени және әлеуметтік сәйкестендірілуі жаһандық ауқымда қоғамның өркендеуіне әкелетін болса, оны жоққа шығаруға ешкімнің құқығы жоқ.

Түйін сөздер: толеранттылық, дін, көпконфессионалдылық, келісім, қақтығыстар.